Тротуарлар, пиёдалар ва велосипед йўлкаларида ҳаракатланиш ҳамда бошқа йўл қоидаларини бузиш

Жавобгарликка сабаб бўладиган ҳаракатлар

Ҳайдовчининг қуйидаги ҳаракатлари Маъмурий жавобгарлик тўғрисидаги кодекснинг 128-моддаси бўйича жавобгарликка сабаб бўлади:

транспорт воситасини тротуар, пиёдалар йўлкаси, велосипед йўлкаси, пиёда ва велосипед йўлкаси ёки уларга туташ яшил майдонлардан юргизиш, махсус автотранспорт воситалари бундан мустасно;
йўл белгилари ёки қатнов қисмидаги чизиқлар билан белгиланган талабларга риоя қилмаслик, бошқа махсус жавобгарлик нормаларида назарда тутилган ҳоллар бундан мустасно;
юк автомобилида рухсат этилмаган ҳолда йўлнинг четки чап қаторида ҳаракатланиш;
йўналишли транспорт воситалари бекатлари ёки пиёдалар ўтиш жойларидан ўтиш қоидаларини бузиш;
ташқи ёритиш асбобларидан фойдаланиш қоидаларини бузиш;
йўловчи ёки пиёдаларга лойқа сачратиш.

Жарима миқдори

Ушбу ҳуқуқбузарликлар учун ҳайдовчига 1 БҲМ миқдорида жарима солинади.

Тротуар ёки пиёдалар йўлкасидан автомобилда ҳаракатланиш фақат пиёдага “ноқулайлик етказиш” эмас, балки мустақил маъмурий ҳуқуқбузарлик бўлиб, 1 БҲМ жаримага сабаб бўлади.

Фото ва видео қайд этиш

128-моддада назарда тутилган айрим ҳуқуқбузарликлар махсус автоматлаштирилган фото ва видео қайд этиш воситалари орқали ҳам аниқланиши мумкин.

Бироқ қатнов қисмидаги чизиқлар талабига риоя этмаслик, ташқи ёритиш асбобларидан фойдаланиш қоидаларини бузиш ҳамда йўловчи ёки пиёдаларга лойқа сачратишга оид ҳолатлар Кодексда автоматлаштирилган қайд этиш доирасидан мустасно қилинган.