Aviachipta xarid qilish

Uzbekistan Airways BAA va Turkiyaga parvozlar uchun bahorgi chegirmalarni boshladi – O‘zbekiston yangiliklari – Gazeta

Chiptani band qilish

Muayyan reys va sanaga joyni oldindan band qilish havo transportida yo‘lovchi va bagaj tashishning zarur sharti hisoblanadi.

Joyni:

telefon;
Internet;
elektron pochta;
tashuvchi yoki uning vakolatli agenti taqdim etgan boshqa aloqa vositalari orqali band qilish mumkin.

Band qilish muddati tashuvchi tomonidan belgilanadi. Band qilish chiptani rasmiylashtirishning dastlabki bosqichi bo‘lib, uning o‘zi tashish huquqini bermaydi.

Muhim: yo‘lovchi belgilangan muddatda to‘lovni amalga oshirmasa yoki tashuvchining boshqa shartlarini bajarmasa, band qilingan joy ogohlantirishsiz bekor qilinishi mumkin.

Chiptani rasmiylashtirish

Har bir yo‘lovchiga qog‘oz yoki elektron chipta rasmiylashtiriladi. Chipta shaxsni tasdiqlovchi hujjat asosida muayyan yo‘lovchi nomiga beriladi va undan boshqa shaxs foydalanishi mumkin emas.

Chiptada, jumladan:

sotilgan joy va sana;
jo‘nash vaqti;
jo‘nash va qo‘nish aeroportlari;
oraliq qo‘nish manzillari;
tashuvchilarning nomi;
tashish shartnomasining boshqa muhim shartlari ko‘rsatiladi.

Chipta belgilangan tarif va yig‘imlar to‘langanidan keyin rasmiylashtiriladi. Tashuvchi tarifga kiritilmagan qo‘shimcha yig‘imlar haqida yo‘lovchini oldindan xabardor qilishi va ularni tashish shartnomasida ko‘rsatishi kerak.

Muhim: elektron chipta bilan uchishda yo‘lovchi o‘z shaxsini tasdiqlovchi hujjatni taqdim etishi shart. Chiptadagi ma’lumotlar hujjatdagi ma’lumotlarga mos bo‘lishi kerak.

Reysga kelmaslik

Yo‘lovchi tashuvchini oldindan xabardor qilmasdan reysga kelmasa:

yo‘nalishning keyingi qismlaridagi bron bekor qilinishi;
tashishdan voz kechish va o‘z vaqtida xabar bermaslik uchun yig‘im undirilishi mumkin.

Agar yo‘lovchi tashuvchini belgilangan muddatda ogohlantirsa, keyingi reyslar bo‘yicha bron taraflarning kelishuviga ko‘ra saqlanishi mumkin.

Tashuvchining aybi yoki tibbiy ma’lumotnoma bilan tasdiqlangan kasallik sababli reysga kelinmagan bo‘lsa, tegishli yig‘im undirilmaydi.

Alohida shartlar

Bolalar, hamrohsiz uchayotgan voyaga etmaganlar, imkoniyati cheklangan yo‘lovchilar, zambilda tashiladigan bemorlar, hayvonlar, qurol, ortiqcha yoki yirik o‘lchamli bagaj bilan uchayotgan yo‘lovchilar uchun tashuvchi alohida band qilish shartlarini belgilashi mumkin.

Joylar sonidan ortiq bron qilingani sababli yo‘lovchi reysga qabul qilinmasa, tashuvchi kompensatsiya xizmatlarini ko‘rsatishi va uni navbatdagi yoki boshqa tashuvchining reysiga joylashtirishi kerak.

Aviachiptani band qilish va rasmiylashtirish tartibi 2238-son Havo transportida yo‘lovchi va bagaj tashish qoidalari bilan belgilangan.