Tashuvchining huquqlari, majburiyatlari va javobgarligi

Tashuvchining huquqlari

Yo‘lovchi jo‘nash, tranzit yoki manzil mamlakati uchun zarur hujjatlarga ega bo‘lmasa yoxud hujjatlar belgilangan talablarga javob bermasa, tashuvchi uni tashishni rad etishi mumkin.

Agar yo‘lovchining mamlakatga kirishi uning hujjatlari mavjud emasligi yoki qonunchilik talablariga rioya qilmaganligi sababli taqiqlansa, tashuvchi:

uni qaytarib olib ketish xarajatlarini undirish;
xarajatlarni qoplash uchun chiptaning foydalanilmagan qismidan foydalanish huquqiga ega.

Bunda kirish taqiqlangan manzilgacha bo‘lgan tashish uchun to‘langan summa qaytarilmaydi.

Tashuvchi adashib boshqa manzilga yuborilgan bagajni uning egasi turgan joyga etkazishi, egasi topilmagan bagajni bojxona ko‘rigiga taqdim etishi mumkin.

Muhim: pasport, viza, tibbiy va boshqa kirish hujjatlarining mavjudligi hamda to‘g‘ri rasmiylashtirilgani uchun birinchi navbatda yo‘lovchining o‘zi javob beradi.

Tashuvchining majburiyatlari

Tashuvchi:

parvoz yo‘nalishlari va jadvallarini;
yo‘lovchi va bagaj tashish tariflarini;
aeroport va havo kemasidagi xizmat shartlarini e’lon qilishi;
yo‘lovchi va bagajni belgilangan yoki oqilona muddatda manzilga etkazishi;
yo‘lovchilarning hayoti, sog‘lig‘i va bagaji saqlanishini ta’minlashi;
tranzit yo‘lovchilar uchun belgilangan sharoitlarni yaratishi kerak.

Ob-havo, texnik sabablar yoki aviatsiya xavfsizligi tufayli jadval yoki tashuvchi o‘zgartirilsa ham, tashuvchi yo‘lovchi va uning bagajini o‘z vaqtida etkazish uchun barcha zarur imkoniyatlardan foydalanishi shart.

Tashuvchining javobgarligi

Tashuvchi qonunchilik va xalqaro shartnomalarda belgilangan doirada:

yo‘lovchining o‘limi yoki sog‘lig‘iga etkazilgan zarar;
ro‘yxatdan o‘tkazilgan bagajning yo‘qolishi, kamomadi yoki shikastlanishi;
tashish shartnomasini bajarishdagi nuqsonlar;
tashuvchining aybi bilan yo‘lovchi kuzatuvidagi buyumlarga etkazilgan zarar uchun javobgar bo‘ladi.

Ro‘yxatdan o‘tkazilgan bagaj tashuvchiga qabul qilingan paytdan uni yo‘lovchiga yoki boshqa vakolatli shaxsga topshirishgacha tashuvchining javobgarligi ostida bo‘ladi.

Qiymati e’lon qilingan bagaj yo‘qolsa, zarar e’lon qilingan qiymat doirasida qoplanadi. Agar tashuvchi e’lon qilingan qiymat haqiqiy qiymatdan yuqori ekanini isbotlasa, haqiqiy qiymat hisobga olinadi.

Muhim: bagaj yo‘qolgan, kam chiqqan yoki shikastlangan bo‘lsa, aeroportdan chiqishdan oldin dalolatnoma rasmiylashtirish va bagaj birkasini saqlash lozim.

Tashuvchining huquqlari, majburiyatlari va javobgarligi 2238-son Qoidalar hamda O‘zbekiston Respublikasi Havo kodeksi bilan belgilangan.

Maqola foydali bo‘ldimi?

Bo‘limlar