Телекоммуникациялар хизматларини кўрсатиш шартномасини тузиш ва бекор қилиш

Шартнома тузиш тартиби

Телекоммуникациялар хизматлари оператор, провайдер ёки эшиттирувчи билан абонент ўртасида тузиладиган шартнома асосида кўрсатилади.

Жисмоний шахс билан шартнома:

шахсни тасдиқловчи ҳужжат тақдим этилган ҳолда шахсан;
вакилнинг шахсини тасдиқловчи ҳужжати ва белгиланган тартибда расмийлаштирилган ишончнома асосида;
техник имконият мавжуд бўлганда Face-ID орқали биометрик идентификация асосида тузилиши мумкин.

Техник сабабларга кўра биометрик идентификациядан ўтиш имкони бўлмаса, шахс операторнинг хизмат кўрсатиш офисига мурожаат қилади.

Оператор шартномани бевосита ёки ўзининг ваколатли дилери орқали тузиши мумкин.

Тақдим этиладиган маълумотлар

Жисмоний шахс шартнома тузишда фамилияси, исми, отасининг исми, яшаш жойи, шахсни тасдиқловчи ҳужжат реквизитлари ва ЖШШИРни тақдим этади.

Юридик шахс бўйича унинг номи, жойлашган манзили, банк реквизитлари ва СТИР кўрсатилади.

Шартномада, қоида тариқасида:

хизмат тури ва сифати;
тариф ва ҳисоб-китоб тартиби;
тарафларнинг ҳуқуқ ва мажбуриятлари;
хизматни вақтинча тўхтатиш шартлари;
шартномани ўзгартириш ва бекор қилиш тартиби;
тарафларнинг жавобгарлиги белгиланади.

Шартнома тузилишидан олдин абонент хизматлар рўйхати, тарифлар, уланиш шартлари, хизмат сифати ва маълумотларни ҳимоя қилиш даражаси ҳақида тўлиқ ахборот олиш ҳуқуқига эга.

Шартномани қайта расмийлаштириш

Абонент худди шу АТС хизмат кўрсатадиган ҳудуддаги янги турар жойга кўчса, техник имконият мавжуд бўлганда шартнома аввалги рақам сақланган ҳолда қайта расмийлаштирилади.

Абонент шу операторнинг бошқа АТС ҳудудига кўчса, техник имконият мавжуд бўлганда унга янги абонент рақами ажратилади.

Телефонлаштирилган турар жойни сотиш, алмаштириш, ижарага бериш, фамилия, манзил ёки реквизитлар ўзгарганда абонент бир ой ичида шартномани қайта расмийлаштириши ёки бекор қилиши керак.

Шартномани бекор қилиш

Абонент оператор шартнома шартларини бузса, хизматдан воз кечиш ва шартномани бекор қилиш ҳуқуқига эга.

Телефон алоқаси қарздорлик сабабли тўхтатилганидан кейин қарз 60 кундан ортиқ муддатда бартараф этилмаса, оператор шартномани бир томонлама бекор қилиши мумкин. Бунда абонент шартнома бекор қилинишидан камида 10 кун олдин хабардор қилиниши шарт.

Шартнома бекор қилинганда абонент фойдаланилмаган аванс қолдиғини қайтаришни талаб қилиши мумкин. Оператор ушбу маблағни мурожаат келиб тушганидан кейин 15 кун ичида қайтариши керак.

Мазкур тартиб Телекоммуникациялар хизматларини кўрсатиш қоидалари билан белгиланган.